PITO-PITO PARA SA PITONG LAWA

San Pablo City – Inilunsad noong Biyernes ang isang kilusan ng mga socio at samahang sibiko na ang layunin ay makapangalap ng pitong milyong piso sa nalolooban ng pitong buwan para sa development projects ng Lingap sa Pitong Lawa Foundation sa lunsod na ito.

Pangungunahan ng Atikha Overseas Workers and Community Initiative Ins. (AOWCII) ang naturang proyekto at ang matitipong pondo ayon kay Marga Roman, marketing director ng Coco Natur OFW Producer Cooperative na sa ilalim ng AOWCII ang gagawing panustos sa pagsusulong ng Entrepreneurship, Education, Environmental Protection at Eco-Tourism (4E) para sa mga magiging benepisyaryo.

Nakapaloob sa konsepto ng proyekto dugtong pa ni Roman ang pagbabayanihan ng mga San Pableño partikular ang mga nagtatrabaho sa ibayong dagat at mga nanatili sa lunsod na kapwa may malasakit sa mga dukhang residente ng lunsod. Pangunahing layunin nito ang maitaas ang antas ng pamumuhay ng mga kapus-palad.

Magsasanib ang Lingap sa Pitong Lawa Foundation at Seven Lakes International sa pangangalap ng isang milyong piso kada buwan na inaasahang magtatapos sa Enero, 2009. Ang coordinating office ng proyekto ay matatagpuan sa SPC Women, Family and OFW Center na ipinatayo ng pamahalaang lunsod para sa mga kahalintulad na adbokasiya. (NANI CORTEZ/SANDY BELARMINO)